2008國慶盃10公里長跑

時間：2008年10月1日上午8時30分正

地點：大埔大尾督堤壩

距離：10km

天氣：晴

到場跑友：羅Sir，佳哥，"偉哥"，能哥，Ray，大舊，霍兄，幫主，Tom少，老板，經理，榮哥，大導，Jerry，神醫，華哥，Benson，Janice，2R，鐡姐，菜遠，各大帥......等等 (排名不分先後)

盡力情度：80.00%

上次中暑之後第一場比賽，一開始已抱住輕鬆跑既心情尼參與，甚至預計不一定能夠完成整個10k賽事......

原先尋日會出埋賽後報告，點知正想動筆之際(開電腦之際)，先發現部腦壞左，故延至今日才出post：

講返尋日朝早，約左舊同學James一齊坐車去會場，佢係第一次參加比賽，諗住同佢一齊跑慢慢跑下。預左慢跑所以到場後，亦無急住做熱身，亦無打亦jog返幾k，反而寄好隨身物品後，就同James四圍行下，吹下水等時間到。

差不多夠鐘，先至上去等開跑，無謂阻住人跑既關係，即使我同James都有報名，而我地仍然排係人群後面。

開跑時，我地都只係跟隨人群慢慢前移，雖然無諗住跑咩時間，但自己仍然慣性地打錶。跑左無幾耐先至見到前面既太子。但仍然保持慢速前進，不竟仍被中暑陰影所籠罩。

跑到咁上下，撞到幫主，見佢好游咁跑，於是拍住幫主齊齊游下游下，James就開始有點跟唔上，不過佢都有多年跑步經驗，10k對佢尼講無咩問題。

無幾耐老板都上埋尼。三人齊齊再游番一段。不過老板要追經理，所以跑到4k之後，開始跑快左，唔覺得好辛苦，所以拍住老板齊齊跑，5k左右就追到經理。

跑 到上斜約6k幾時，睇睇錶估計仲可以係50min內完成，於是開始跑快左些少，之後見到benson，佢問我點解跑得咁慢...... 於是開始跑返快些少，落到直路無耐就追上左2R中的Raymond，keep住加速既情況下，無幾耐就追到Tom少，過埋之後差不多到終點，最後幾一百稍 為再提速，到終點睇睇表，時間48'25"16，能夠50min內跑晒已經好滿足。

rayray與幫主游下游下時被拍下的照片